ஸ்ரீலங்கா சுதந்திரக் கட்சியின் புதிய மாவட்ட அமைப்பாளர்களாக ஒன்பது பேர் நியமிக்கப்பட்டுள்ளார்கள்.

ஸ்ரீலங்கா சுதந்திரக் கட்சியின் புதிய மாவட்ட அமைப்பாளர்கள் ஒன்பது பேர் நியமிக்கப்பட்டுள்ளார்கள். இவர்களுக்கான நியமனக் கடிதம் வழங்கும் நிகழ்வு ஜனாதிபதி மைத்ரிபால சிறிசேன தலைமையில் இன்று முற்பகல் ஜனாதிபதி செயலகத்தில் இடம்பெற்றது.

கொழும்பு மாவட்ட அமைப்பாளராக நளின் குணசேகர நியமிக்கப்பட்டுள்ளார். ஸ்ரீலங்கா சுதந்திரக் கட்சியின் அம்பாறை மாவட்ட சுதந்திரக் கட்சி அமைப்பாளர்களாக மீரா லெப்பை, நவனீதராஜா, அப்துல் வஹாப் ரி.ரஃபாயிதீன் ஆகியோர் நியமிக்கப்பட்டுள்ளார்கள். மாத்தறை மாவட்ட அமைப்பாளராக பிரனீத் பத்மதிலக்க நியமிக்கப்பட்டுள்ளார். எச்.எம்.ஸக்கரியா இரத்தினபுரி மாவட்ட அமைப்பாளராவார். மாத்தளை மாவட்ட அமைப்பாளராக சுஜீவ கொடலியத்த நியமிக்கப்பட்டிருக்கிறார்.

ஹம்பாந்தோட்டையில் இடம்பெற்ற ஆர்ப்பாட்டம் தமக்கு எதிரான அரசியல் சதியாகும் என்று அமைச்சர் மஹிந்த அமரவீர தெரிவித்துள்ளார்.

ஹம்பாந்தோட்டை நகரில் அண்மையில் இடம்பெற்ற ஆர்ப்பாட்டம் தமக்கு எதிரான அரசியல் சதியாகும் என்று அமைச்சர் மஹிந்த அமரவீர தெரிவித்துள்ளார். வங்குரோத்து அரசியலை ஹம்பாந்தோட்டை மக்கள் நிராகரித்ததாகவும் அவர் கூறினார். ஹம்பாந்தோட்டை மக்களுக்கு எந்த விதத்திலும் அநீதி ஏற்பட இடமளிக்கப்படாது என்றும் அவர் வலியுறுத்தினார். பாராளுமன்ற கட்டடத் தொகுதியில் இன்று இடம்பெற்ற செய்தியாளர் மாநாட்டில் அவர் இதனைத் தெரிவித்தார்.

மருத்துவ பீட மாணவர்கள் சில அரசியல் கட்சிகளின் கைபொம்மையாக மாறியுள்ளார்கள் என இராஜாங்க அமைச்சர் மொஹான்லால் கிரேரு சுட்டிக்காட்டியுள்ளார்.

மருத்துவ பீட மாணவர்கள் சீர்குலைப்பில் ஈடுபட்டுவரும் சில அரசியல் கட்சிகளின் கைபொம்மைகளாக மாறியுள்ளதாக இராஜாங்க அமைச்சர் மொஹான்லால் கிரேரு தெரிவித்துள்ளார். சைட்டம் நெருக்கடிக்கு தீர்வுகாண அரசாங்கம் நடவடிக்கை எடுத்துள்ளது. சைட்டம் நிறுவனத்தை மூடிவிடுவதன் மூலமே தீர்வு கிடைக்கும் என்பது ஒரு பக்க சார்பான கருத்தாகும் என்று அவர் கூறினார்.

அரச துறையில் புதிய மருத்துவப் பீடங்களும் இஸ்தாபிக்கப்படவிருக்கின்றன. சைட்டம் நிறுவனத்திற்கு புதிய மாணவர்களை இணைத்துக் கொள்ளும் நடவடிக்கை தற்காலிகமாக இடைநிறுத்தப்பட்டுள்ளதாகவும் அவர் கூறினார். பாராளுமன்றத்தில் இன்று இடம்பெற்ற விவாதத்தில் அவர் கருத்து வெளியிட்டார்.

இலத்திரனியல் கொடுக்கல் வாங்கல் தொடர்பான சட்டமூலம் இன்று பாராளுமன்றத்தில் விவாதிக்கப்படுகிறது. புதிய நாட்டை கட்டியெழுப்ப பாரம்பரிய முறைகளிலிருந்து விலகி, புதிய ஆரம்பத்தை ஏற்படுத்துவது அவசியமாகும் என்று விவாதத்தில் கலந்து கொண்ட அமைச்சர் சம்பிக்க ரணவக்க தெரிவித்தார். டிஜிட்டல் இலத்திரனில் தொழில்நுட்பத்தின் மூலமே புதிய உலகம் கட்டியெழுப்பப்படுவதாகவும் அவர் கூறினார்.

குடும்ப சுகாதார மருத்துவப் பெண்களுக்கு டெப் கணினிகளை வழங்குவது பற்றி கவனம் செலுத்தப்பட்டுள்ளதாக விவாதத்தில் கலந்து கொண்ட ஹரீன் பெர்னாண்டோ கூறினார்.

இம்முறை ஜி-24 மாநாட்டின் தலைமைத்துவம் இலங்கைக்கு.

அமெரிக்காவில் நடைபெற்ற இம்முறை ஜி-24 மாநாட்டின் தலைமைத்துவம் நிதி மற்றும் ஊடகத்துறை அமைச்சர் மங்கள சமரவீரவுக்கு கிடைத்துள்ளது. அதனை அடுத்து. அந்த மாநாட்டில் உரையாற்றிய அமைச்சர், மக்களின் வாழ்க்கைத் தரத்தை மேம்படுத்துவதற்கு நடவடிக்கை மேற்கொள்வதே உறுப்பு நாடுகளின் கூட்டு பொறுப்பாக இருக்க வேண்டுமென குறிப்பிட்டார்.

அபிவிருத்தி, தொழில்வாய்ப்பு மற்றும் கட்டமைப்பு ரீதியான மாற்றம் என்பது இம்முறை மாநாட்டின் தொனிப் பொருளாகும். கடந்த கால அனுபவங்களை கருத்திற்கொண்டு பல முக்கியத்துவங்கள் குறித்து கவனம் செலுத்தப்பட வேண்டுமென அமைச்சர் குறிப்பிட்டார். தொழில் வாய்ப்புக்களை உருவாக்குவதற்காக வினைத்திறனை அதிகரித்தல், அபிவிருத்திக்கான நிதியை வழங்குதல் என்பன கருத்திற் கொள்ளப்பட வேண்டிய முக்கிய விடயங்களாகும். சர்வதேச வர்த்தகம், புதிய உற்பத்திகள், தனியார் துறையின் முதலீடுகளை விருத்தி செய்தல் என்பன குறித்தும் கவனம் செலுத்தப்பட வேண்டுமென அமைச்சர் சுட்டிக்காட்டினார்.

தமிழ் அரசியல் கைதிகளின் உரிமைகள் தொடர்பான பிரேரணையை எதிர்க்கட்சித் தலைவர் இன்று பாராளுமன்றத்தில் சமர்ப்பிக்கின்றார்.

20 நாட்களுக்கும் மேலாக உண்ணாவிரதத்தில் ஈடுபட்டிருந்த மூன்று தமிழ் அரசியல் கைதிகளுக்கு எதிரான வழக்கு விசாரணையை அவர்களின் கோரிக்கைக்கு அமைய, வவுனியா மேல் நீதிமன்றத்தில் நடத்தாமல், சிங்கள மொழியில் வழக்கை விசாரிக்கும் ஒரு நீதிமன்றத்திற்கு மாற்றுவதன் மூலம் அவர்களின் அடிப்படை உரிமைகள் மீறப்பட்டுள்ளதாக முன்வைக்கப்பட்டுள்ள பிரேரணையை எதிர்க்கட்சித் தலைவர் ஆர் சம்பந்தன் பாராளுமன்றத்தில் சமர்ப்பிக்கவுள்ளார்.

பயங்கரவாத தடுப்பு சட்டத்தின் கீழ் தடுத்து வைக்கப்பட்டுள்ள வடக்கு, கிழக்கு பிரதேசங்களை சேர்ந்தவர்களை காலம் தாழ்த்தாமல் விடுவிக்குமாறு கோரி இன்று பாராளுமன்ற சபை ஒத்திவைப்பு வேளையின் போது இந்த பிரேரணை முன்வைக்கப்படவுள்ளது. அவசர பொதுத் தேவையாகக் கருதி, இந்தப் பிரேரணையை முன்வைப்பதாக எதிர்க்கட்சித் தலைவர் சபாநாயகருக்கு அறிவித்துள்ளார்.

கடந்த 18 மணித்தியாலங்களுக்குள் நாட்டின் பல பிரதேசங்களில் ஐந்து வாகன விபத்துக்கள்.

கடந்த 18 மணித்தியாலங்களுக்குள் நாட்டின் பல பிரதேசங்களில் ஐந்து விபத்துக்கள் பதிவாகியிருப்பதாக பொலிஸ் தலைமையகம் அறிவித்துள்ளது. கிரியுல்ல ஆண்டிகம பிரதேசத்தில் நேற்று பிற்பகல் இரண்டு மோட்டார் சைக்கிள்கள் நேருக்கு நேர் மோதியதில் மோட்டார் சைக்கிளில் பயணித்த ஒருவர் உயிரிழந்துள்ளார்.

நேற்றிரவு குருநாகல் மல்கடுவாவ பிரதேசத்தில் பாதசாரி ஒருவர் லொறியுடன் மோதி உயிரிழந்துள்ளார்.

கடவத்த இந்திகஹமுல சந்தியில் ஜீப் வண்டியில் மோதிய பாதசாரி ஒருவரும் உயிரிழந்துள்ளார்.

பட்டபொல பொல்லெவ்வ பிரதேசத்தில் இடம்பெற்ற வான விபத்தொன்றிலும் ஒருவர் உயிரிழந்துள்ளார்.

இதேவேளை, அம்பலாந்தோட்டை நகரில் கடமையில் ஈடுபட்டிருந்த சிவில் பாதுகாப்பு உத்தியோகத்தர் ஒருவர் கெப் வண்டியில் மோதி உயிரிழந்திருப்பதாக பொலிஸ் தலைமையகம் அறிவித்துள்ளது.

புதிய கடற்படைத் தளபதியின் நியமனத்தைத் தொடர்ந்து இலங்கை கடற்பரப்பிற்குள் சட்டவிரோதமாக வரும் இந்திய மீனவர்களின் எண்ணிக்கையில் வீழ்ச்சி.

வடக்கு கடலில் பாதுகாப்பிற்காக பயன்படுத்தப்பட்டுள்ள கப்பல் ரோந்து முறை விரிவுபடுத்தப்பட்டுள்ளதைத் தொடர்ந்து இலங்கை கடற்பரப்பிற்குள் சட்டவிரோதமாக வரும் இந்திய மீனவர்களின் எண்ணிக்கை வீழ்ச்சி கண்டிருப்பதாக கடற்படை அறிவித்துள்ளது. வைஸ் எட்மிரல் ட்ரவிஸ் சின்னையா கடற்படை தளபதியாக நியமிக்கப்பட்டதன் பின்னர் நடைமுறைப்படுத்திய புதிய உத்தி காரணமாக கடந்த சில வாரங்களுக்குள் இலங்கை கடற்பரப்பிற்குள் வரும் இந்திய இழுவை படகுகளின் எண்ணிக்கை குறைந்துள்ளது. அதனால், சட்டவிரோத மீன்பிடியில் ஈடுபடுபவர்களை கைது செய்யும் அளவும் குறைந்துள்ளது. கடற்படையினர் கைப்பற்றும் மீன்பிடி படகுகளின் எண்ணிக்கையும் குறைந்துள்ளது. எனினும், கடற்படையினர் 24 மணிநேரமும் ரோந்து பணியில் ஈடுபட்டுள்ளனர்.

ஹம்பாந்தோட்டை ஆர்ப்பாட்டத்துடன் தொடர்புடையவர்களை விடுவிப்பதற்கு எதிர்ப்பு தெரிவி;த்து தான் நீதிமன்றத்திற்கு சமர்ப்பித்ததாக கூறும் ஆவணம் தொடர்பில் அமைச்சர் மஹிந்த அமரவீர தெளிவுபடுத்துகிறார்.

ஹம்பாந்தோட்டை ஆர்;ப்பாட்டத்துடன் தொடர்புடையவர்களை விடுவிப்பதற்கு எதிர்ப்பு தெரிவித்து தான் நீதி மன்றத்திற்கு சமர்ப்பித்ததாகக் கூறும் கடிதம் தொடர்பில் அமைச்சர் மஹிந்த அமரவீர தெளிவுபடுத்தியள்ளார். நேற்று பிணையில் விடுதலை செய்யப்பட்ட சமயம் தம்மை விடுவிப்பதற்கு எதிர்ப்பு தெரிவித்து ஐக்கிய மக்கள் சுதந்திரக் கூட்டமைப்பின் செயலாளர் மஹிந்த அமரவீர நீதிமன்றத்தில் சமர்ப்பித்த ஆவணத்தை நீதிமன்றம் புறக்கணித்ததாக பாராளுமன்ற உறுப்பினர் நாமல் ராஜபக்ஷ உள்ளிட்ட தரப்பினர் ஊடகங்களுக்கு கருத்து வெளியிட்டனர்.

இதனை அமைச்சர் முற்றாக மறுத்துள்ளார். அந்தக் கூற்றில் எந்தவித உண்மையும் இல்லை. தான் ஒருபோதும் அவ்வாறான ஆவணம் ஒன்றை நீதிமன்றத்திற்கு சமர்ப்பிக்கவில்லை என அமைச்சர் வலியுறுத்தினார். நாமல் ராஜபக்ஷ உள்ளிட்ட தரப்பினர் தமது அரசியல் நற்பெயரை சீர்குலைப்பதற்காக இவ்வாறான கூற்றை வெளியிட்டிருப்பதாக அமைச்சர் நம்புகின்றார். இல்லையென்றால், அவர்கள் விடயத்தை தவறாக புரிந்துள்ளார்கள் என அமைச்சர் கூறியுள்ளார். எவ்வாறாயினும், இது தொடர்பில் உண்மையை கண்டறிவதற்காக சட்டமா அதிபரிடம் ஒரு முறைப்பாட்டை முன்வைக்கவுள்ளதாக அமைச்சர் மஹிந்த அமரவீர தெரிவித்துள்ளார். அவ்வாறான ஒரு ஆவணம் சமர்ப்பிக்கப்பட்டிருக்காவிட்டால், அது அவர்கள் நீதிமன்றத்தை அவமதித்த செயலாக அமைந்துவிடும் என அவர் சுட்டிக்காட்டியுள்ளார்.

பிள்ளைகளின் மனோநிலை குறித்து போட்டித் தன்மைக்கு அப்பால் சிந்திக்குமாறு ஜனாதிபதி பெற்றோரிடம் கோரிக்கை.

பிள்ளைகளின் பரீட்சைகள் பற்றி பெற்றோர் மத்தியில் விளக்கமளிக்கும் வேலைத்திட்டத்தின் அவசியத்தை ஜனாதிபதி மைத்திரிபால சிறிசேன வலியுறுத்தியுள்ளார்.

பிள்ளைகளை பரீட்சைகளுக்குத் தயார்ப்படுத்தல், பெறுபேறுகளின் முன்னிலையில் பெற்றோர் பதிலளிக்கும் விதம் போன்றவை எந்தளவு நாகரீகமானவை என்பது பற்றி பெற்றோருக்கு விளக்கமளிக்க வேண்டுமென ஜனாதிபதி குறிப்பிட்டார்.

பிள்ளைகளின் மனோநிலை அவர்களின் உணர்வுகள் பற்றி போட்டித் தன்மைக்கு அப்பாற்பட்டு கவனம் செலுத்துவது அவசியம். அது பற்றி பெற்றோருக்கு புரிந்துணர்வை ஏற்படுத்தும் கட்டாயமான தேவை உள்ளதென அவர் கூறினார். கொழும்பு ரோயல் கல்லூரியின் 165வது பரிசளிப்பு விழாவில் ஜனாதிபதி உரையாற்றினார்.

போதைப்பொருள் புழக்கம், தகவல் தொழில்நுட்பத்தின் இருண்ட பக்கங்கள் போன்றவற்றிற்கு மத்தியில் பிள்ளைகளை ஒழுக்கமிக்கவர்களாக வளர்த்து நாகரீகமான சமுதாயத்தை கட்டியெழுப்புவது சவாலாக மாறியுள்ளது. இதுபற்றி கவனம் செலுத்த வேண்டுமென ஜனாதிபதி குறிப்பிட்டார்.

இந்த நிகழ்ச்சியில் பிரதமர் ரணில் விக்ரமசிங்க உள்ளிட்ட முக்கியஸ்தர்கள் கலந்து கொண்டார்கள்.

உள்ளுராட்சி தேர்தலுக்கான வேட்புமனுக்களைத் தயாரிக்கும் பணி இறுதிக் கட்டத்தில் உள்ளதாக ஐக்கிய மக்கள் சுதந்திர முன்னணி அறிவிப்பு.

எதிர்வரும் உள்ளுராட்சித் தேர்தலுக்கான வேட்புமனுக்களைத் தயாரிக்கும் பணிகளில் 95 சதவீதமானவை பூர்த்தியாகியுள்ளதென ஐக்கிய மக்கள் சுதந்திர முன்னணியின் பொதுச் செயலாளர் அமைச்சர் மஹிந்த அமரவீர தெரிவித்துள்ளார்.

நேற்று இடம்பெற்ற செய்தியாளர் மாநாட்டில் கருத்து வெளியிட்ட போது, தேர்தலில் வெற்றி பெற்று தனியான ஆட்சியை அமைப்பது ஸ்ரீலங்கா சுதந்திரக் கட்சியின் அபிலாஷை என அமைச்சர் கூறினார்.

எதிர்வரும் தேர்தலுக்கான நியமனப்பத்திரங்களில் கற்றறிந்த மற்றும் கறைபடியாத மக்கள் பிரதிநிதிகளுக்கு வாய்ப்பளிக்கப்படுமென அமைச்சர் மஹிந்த அமரவீர மேலும் தெரிவித்தார்.