Sri Lanka Brodcasting Corporation

Mon07242017

Last updateMon, 24 Jul 2017 1pm

දේශීය පුවත්

ආසියා ශාන්තිකර විදුලි සංදේශ සංගමයේ 17 වැනි ප්‍රතිපත්ති හා නියාමන සමුඵව ජනපති ප්‍රධානත්වයෙන් කොළඹදී ඇරඹේ.

ආසියා ශාන්තිකර විදුලි සංදේශ සංගමයේ 17 වැනි ප්‍රතිපත්ති හා නියාමන සමුඵව ජනාධිපති මෛත්‍රිපාල සිරිසේන මැතිතුමාගේ ප්‍රධානත්වයෙන් කොළඹදී අද ආරම්භ විය.  සමුඵව අවසන් වන්නේ ලබන බදාදායි.  විදුලි සංදේශ හා තොරතුරු සන්නිවේදන තාක්ෂණ ප්‍රතිපත්ති සම්පාදකයන්ට හා නියාමකයන්ට විදුලි සංදේශ සහ තොරතුරු හා සන්නිවේදන තාක්ෂණ අංශයේ සිදුවුනු වෙනස්කම්වලින් ප්‍රතිඵලයක් ලෙස මුහුණදීමට සිදුවන ගැටඵ පිළිබඳව එක්ව සාකච්ඡා කිරීම සදහා පොදු වේදිකාවක් සකස් කිරීම සමුඵවේ අරමුණයි.  

සමුඵවේ සමාරම්භය සනිටුහන් කරමින් පිරිස පිළිගත්තේ ආසියා ශාන්තිකර විදුලි සංදේශ සංගමයේ මහ ලේකම් ඇර්වන් හැචොරන්ග්සි මහත්මියයි.  ප්‍රතිපත්ති හා නියාමන සමුඵවේ සභාපති සෙයිපි ටකාජි මහතා විශේෂ කරුණු පැහැදිලි කිරීමක් කළ අතර සමාරම්භක දේශනය පැවැත්වුයේ ශ්‍රී ලංකා විදුලි සංදේශ නියාමන කොමිසමේ සභාපති ජනාධිපති ලේකම් ඔස්ටින් ප්‍රනාන්දු මහතායි.

මහනුවර-මහියංගනය මාර්ගයේ අනතුරකින් 22 ක් තුවාල ලබති.

මහනුවර-මහියංගනය මාර්ගයේ 18 වංගුව ප්‍රදේශයේ අද අලුයම සිදුවු අනතුරකින් පුද්ගලයෝ 22 දෙනෙක් තුවාල ලබති. මහනුවර සිට මහියංගනය දෙසට ධාවනය වු පෞද්ගලික බස්රථයක් 08 වන වංගුවේදී මාර්ගයෙන් ඉවත පැනීමෙන් අනතුර සිදුවිය. තුවාල ලැබුවන් මහියංගනය රෝහලට ඇතුලත් කර ඇති අතර ඒ අතරින් තිදෙනෙකුගේ තත්ත්වය බරපතල බව රෝහල් ආරංචි මාර්ග කියයි.

දෙහිඅත්තකණ්ඩියේ පදිංචි පිරිසක් කොළඹ පැවති ආගමික කටයුත්තකට සහභාගිවී ආපසු යමින් සිටියදී අනතුර සිදුවී ඇතැයි හසලක පොලිසිය පවසයි. බස්රථයේ තිරිංග ක්‍රියාවිරහිතවීම අනතුරට හේතුවයි.


මේ අතර.ගාල්ල වදුරඹ ප්‍රධාන මාර්ගයේ කිහිඹිකන්ද ප්‍රදේශයේදී අද පෙරවරු 8.30 ට පමණ බස්රථ දෙකක් මුහුණට මුහුණලා ගැටීමෙන් අනතුරක් සිදුවී තිබේ. එහිදී තුවාල ලැබු 15 දෙනෙකු කරාපිටිය රෝහලේ ප්‍රතිකාර ලබමින් සිටින බව පොලිසිය පවසයි. එක් බස්රථයක ගමන් කර ඇත්තේ ඇගලුම් කර්මාන්ත ශාලාවක සේවකයින් පිරිසකි. බස්රථ දෙකේ රියදුරුන් අත්අඩංගුවට ගෙන ඇති අතර වදුරඹ පොලිසිය වැඩිදුර විමර්ෂණ සිදු කරයි.

වැරදි කරන පුද්ගලයන්ට දඩුවම් පැමිණවීම රණවිරු දඩයමක් වන්නේ කෙසේදැයි ඇමති ගයන්ත කරුණාතිලක මහතා ප්‍රශ්න කරයි.

වැරදි කරන පුද්ගලයන්ට දඩුවම් පැමිණවීම රණවිරු දඩයමක් වන්නේ කෙසේදැයි ඇමති ගයන්ත කරුණාතිලක මහතා ප්‍රශ්න කරයි. එය රණවිරු දඩයමක් ලෙස පෙන්වමින් පටු දේශපාලන වාසි ලබා ගැනීමට ඇතැම් පිරිස් උත්සාහ දරති. සිරිකොත එක්සත් ජාතික පක්ෂ මුලස්ථානයේ අද පැවති මාධ්‍ය හමුවකදී ඇමතිවරයා පැවසුවේ නිල ඇඳුමට මුවාවී වැරදි කිරීමට කිසිවෙකුටත් ඉඩදිය නොහැකි බවයි.

වැරදි කළ හමුදා සාමාජිකයන්ට දඩුවම් කිරීම පිළිබඳ සාක්ෂි අතීතයේදී ද පෙන්වාදිය හැකිය. රණවිරුවන් වෙනුවෙන් අදහස් දක්වන පිරිස් හමුදාව වෙනුවෙන් විශාල කාර්යභාරයක් ඉටුකළ මේජර් ජනරාල් ජානක පෙරේරා මහතාට නිසි ආරක්ෂාවක් ලබා නොදුන් අන්දම ඇමතිවරයා සිහිපත් කළේය. රට ත්‍රස්තවාදයෙන් බේරා ගැනීමට ජිවිත පරිත්‍යාගයෙන් කටයුතු කළ සරත් ෆොන්සේකා මහතා දේශපාලනයට පිවිසි අවස්ථාවේ ඔහුට සැලකු අන්දම ජනතාවට අමතක නැතැයි ඔහු සදහන් කළේය.
පාර්ලිමේන්තු මන්ත්‍රි හර්ෂණ රාජකරුණා මහතා එහිදී පැවසුවේ රට තුළ සංහිදියාව ගොඩනැංවීමට රජය ක්‍රියාකරන අවස්ථාවේ ඇතැම් පිරිස් එම සංහිදියාව විනාශ කිරීමට ක්‍රියාකරන බවයි.

වෙළෙඳපලේ සහල් හිගයක් ඇතිවීමට කිසිදු ඉඩක් නැතැයි රජය අවදාරණය කරයි.

මාස තුනකට ප්‍රමාණවත් සහල් රට තුළ පවතින බව කර්මාන්ත හා වාණිජ කටයුතු අමාත්‍යංශයේ ලේකම් චින්තක එස්. ලොකුහෙට්ටි මහතා කියයි.  පෞද්ගලික අංශය පසුගිය සතියේදී සහල් මෙට්‍රික් ටොන් 13 දහසක් ආනයනය කර තිබේ.  පාකිස්ථානය හා මීයන්මාරය සහල් ආනයනය කිරීමට රජය ගිවිසුම්වලට එලඹ ඇතැයි ලේකම්වරයා සදහන් කරයි.  සහල් මෙට්‍රික් ටොන් ලක්ෂ තුනක් ආනයනය කිරීම රජයේ ඉලක්කයයි.  ඉන් මෙට්‍රික් ටොන් 50 දහසක් කඩිනමින් ආනයනය කෙරේ.

 සතොස ආයතනය ද ඉන්දියාවෙන් සහල් ආනයනය කිරීමට පියවර ගෙන තිබේ.  මෙම තත්ත්වය හමුවේ රටේ අවශ්‍යතාවට ප්‍රමාණවත් සහල් රට තුළ පවතින බව ලේකම්වරයා කියයි.  ආනයනය කරන සහල් ආරක්ෂිත තොගයක් ලෙස පවත්වාගෙන යාමට රජය අපේක්ෂා කරයි.  දේශිය වශයෙන් මිලදී ගත් වී සහල්කර වෙළෙඳපොලට නිකුත් කෙරේ.  ආනයනිත සහල් මිළ ඉදිරියේදී පහත වැටිමට ඉඩ ඇතැයි ද ලේකම්වරයා විශ්වාසය පළ කරයි.

අධිකරණ විනිසුරුවරුන්ගේ ආරක්ෂාවට විශේෂ වැඩපිළිවෙලක් ක්‍රියාවට නංවන්නැයි ජනපතිගෙන් පොලිස්පතිට උපදෙස්.

යාපනය මහාධිකරණ විනිසුරු එම් ඉලංචෙලියන් මහතා ගමන් කරමින් සිටියදි එල්ල වු වෙඩි ප්‍රහාරය ජනාධිපති මෛත්‍රිපාල සිරිසේන මැතිතුමා හෙලා දකි.  නල්ලුර් ප්‍රදේශයේදි එල්ල වු එම ප්‍රහාරයේදි ජිවිතක්ෂයට පත් පොලිස් සැරයන් සරත් ප්‍රේමචන්ද්‍ර මහතාගේ අභාවය පිලිබදව ජනාධිපතිතුමා සිය බලවත් කනගාටුව පලකර සිටි.

මේ සිදුවිමත් සමග විනිසුරුවරුන්ගේ ආරක්ෂාව පිලිබදව සිය අවධානය යොමු කල ජනාධිපතිතුමා විනිසුරුවරුන්ගේ ආරක්ෂාව උදෙසා විශේෂ වැඩපිලිවෙලක් ක්‍රියාවට නංවන ලෙසට ජනාධිපතිතුමා පොලිස්පතිවරයාට උපදෙස් දුන්නේය.  මියගිය පොලිස් සැරයන්වරයාගේ අභාවය සම්බන්ධයෙන් ඔහුගේ පවුලේ ඥාතින් වෙත සිය බලවත් කනගාටුව පලකල ජනාධිපතිතුමා තම රාජකාරිය නිසිලෙස ඉටුකරන මෙවන් නිලධාරින් සමස්ථ රාජ්‍ය සේවයටත් පොලිස් දෙපාර්තමේන්තුවටත් ආදර්ශයක් බවද සදහන් කරයි.

ජනාධිපතිතුමාගේ මත්ද්‍රව්‍ය නිවාරණ වැඩපිලිවෙල අස්ගිරි මහානායක හිමියන්ගේ ඇගයිමට

රටේ පලමු පුරවැසියා වශයෙන් අනාගත පරපුරට ආදර්ශයක් සපයමින් ජනාධිපති මෛත්‍රිපාල සිරිසේන මැතිතුමා ගෙනයන මත්ද්‍රව්‍ය නිවාරණ වැඩපිලිවෙල අස්ගිරි පාර්ශවයේ මහානායක අතිපුජ්‍ය ආචාර්ය වරකාගොඩ ඥාණරතන මහානායක ස්වාමින් වහන්සේගේ ඇගයිමට ලක්වෙයි. මත්ද්‍රව්‍ය උවදුර ජාතික ආගමික ව්‍යවසනයක් බවට පත්ව තිබේ. ඉන් රටේ අනාගත පරපුර බේරාගැනිමට පක්ෂ පාට භේදයකින් තොරව ජනාධිපතිතුමා ගෙන යන එම කටයුත්තට අප සියලුදෙනා එක්විය යුතුය. එය රටේ වැඩිහිටියන් වශයෙන් අ පසතු වගකිම හා යුතුකම බව උන් වහන්සේ පෙන්වා දෙති.

අස්ගිරි මහාවිහාර ශ්‍රි දළදා දහම් පාසලේ අද පැවැති දැහැමි පරපුරක් මතින් නිදහස් රටක් සම්මන්ත්‍රණ මාලාවේ සිව්වැනි සම්මන්ත්‍රණයට සහභාගි වෙමින් උන් වහන්සේ මෙම අදහස් පලකලහ. මත්ද්‍රව්‍ය නිවාරණ ජනාධිපති කාර්ය සාධක බලකාය ශ්‍රි ලංකා ගුවන් විදුලි සංස්ථාවේ ආගමික අංශය හා විදුල ළමා ගුවන් විදුලිය එක්ව වැඩසටහන සංවිධානය කරයි.


පේරාදෙනිය විශ්ව විද්‍යාලයේ මහාචාර්ය ඩබ්ලිව් එම් තිලකරත්න මහතා සම්මන්ත්‍රණයේ ප්‍රධාන දේශනය පැවැත්විය. ජනාධිපතිතුමාගේ මතින් නිදහස් රටක් සංකල්පයට සමගාමිව ශ්‍රි ලංකා ගුවන් විදුලි සංස්ථාවේ අධ්‍යක්ෂ ජනරාල් ඒරානන්ද හෙට්ටිආරච්චි මහතාගේ මග පෙන්විම යටතේ සම්මන්ත්‍රණ මාලාව සංවිධානය කෙරේ. දැහැමි පරපුරක් නිදහස් රටක් වැඩසටහන එලැඹෙන නිකිණි පුරපසලොස්වක පොහෝ දින පස්වරු 2 සිට සිංහල ස්වදේශිය සේවය ඔස්සේ ප්‍රචාරය කෙරේ.

ලෝක සෞඛ්‍ය සංවිධානයේ ඩෙංගු මර්දන ක්‍රියාකාරි සැලැස්ම ක්‍රියාවට නැංවෙයි.

දිවයිනට පැමිණ සිටින ලෝක සෞඛ්‍ය සංවිධානයේ නියෝජිතයන් ඩෙංගු වසංගතය පාලනය කිරිම සදහා ක්‍රියාකාරි සැලැස්මක් සකස් කර ඇති බව අමාත්‍ය රාජිත සේනාරත්න මහතා පවසයි. ඩෙංගු වසංගතය සති 4 කින් සියයට පනහක් දක්වා අඩුකර ගැනිමේ ක්‍රියාකාරකම් එහි අඩංගුවේ. ඒ සම්බන්ධයෙන් සෞඛ්‍ය අමාත්‍යංශයේ නිලධාරින් දැනුවත් කිරිමේ වැඩසටහනක් අද පැවැත්වේ.

ඉන් අනතුරුව ලෝක සෞඛ්‍ය සංවිධානයේ ක්‍රියාකාරි සැලැස්ම ක්‍රියාවට නංවන බව සේනාරත්න මහතා කියයි. බස්නාහිර පලාතේ මදුරු මර්ධන සහායකයන්ට පැය 2 ක පුහුණුවක් ලබාදිමට ද ලෝක සෞඛ්‍ය සංවිධානයේ නියෝජිතයන් තිරණය කර ඇත. පානදුර කෙසෙල්වත්ත ක්‍රිඩාංගනයේ ඊයේ පැවැති ජාතික ඩෙංගු මදුරු මර්දන වැඩසටහනට සහභාගිවෙමින් සේනාරත්න මහතා මේ බව අනාවරණය කලේය.

කසළ වලින් විදුලිය නිපදවන යෝජනා ක්‍රම 3 ක්

ඉවත දමන කසළ වලින් විදුලිය නිපදවන යෝජනා ක්‍රම 3 ක් බස්නාහිර පලාතේ ලබන මාසයේදි ආරම්භ කරන බව අමාත්‍ය පාඨලි චම්පික රණවක මහතා පවසයි. රටේ කසළ ප්‍රශ්ණයට විසදුමක් වශයෙන් අවසාන රැදවුම් ස්ථානයක් අරුවක්කාලුවේ ඉදිකෙරේ. කොළඹ නගරයේ දෛනිකව එකතු වන කසළ ටොන් 700 න් 300 ක් කොම්ෆෝස්ට් පොහොර බවට පත්කරන බව රණවක මහතා පෙන්වා දෙයි.

තවත් ටොන් 100 යක් ප්‍රතිචක්‍රියකරණයට ලක්කෙරේ. මෙම තත්ත්වය ඉදිරියේදි තවදුරටත් වැඩිදියුණු කරන බව අමාත්‍යවරයා සදහන් කලේ ඇල්ල දුම්රිය චතුරශ්‍රය විවෘත කිරිමේ උත්සවයට සහභාගිවෙමිනි. 2016 වසරේ ආරම්භ වු මෙම ව්‍යාපෘතිය සදහා වැය කරන ලද මුදල රුපියල් මිලියන 30 කි. අමාත්‍ය හරින් ප්‍රනාන්දු මහතා ඇතුලු මැතිඇමතිවරු කිහිපදෙනෙක් ද මෙම අවස්ථාවට එක්ව සිටියහ.

ශ්‍රී ලංකාව ඉන්දියන් සාගරයේ කේන්ද්‍රස්ථානය බවට පත් කිරීම සදහා ආසියානු රටවල් සමග සහයෝගයෙන් කටයුතු කරන බව අගමැතිවරයා පවසයි

ශ්‍රී ලංකාව ඉන්දියන් සාගරයේ කේන්ද්‍රස්ථානය බවට පත් කිරීම සදහා ආසියාවේ අනෙකුත් රටවල් සමග සහයෝගයෙන් කටයුතු කරන බව අගමැති රනිල් වික්‍රමසිංහ මහතා පවසයි.  ශ්‍රී ලංකාව ඉන්දියාව සමග සමීපව කටයුතු කරමින් චීනය සහ ජපානය සමග එක්ව මෙරට අභිවෘද්ධීයට අවශ්‍ය පියවර ගෙන ඇතැයි අගමැතිවරයා පවසයි.  

තම දේශපාලන දිවියට වසර 40 ක් පිරීම නිමිත්තෙන් සිය පෞද්ගලික මුහුණුපොතේ අගමැතිවරයා මෙම අදහස් පලකර තිබේ. රැකියා උත්පාදනය අරමුණු කරගනිමින් ආයෝජන අවස්ථා වැඩිකරගතයුතු බවත් දේශීය ව්‍යවසායකයන් තරගකාරී මාවතකට යොමු කරමින් විදේශීය ආයෝජන රටට ලගාකරගතයුතු බවත් අගමැතිවරයා පෙන්වා දෙයි.

 මහින්ද රාජපක්‍ෂ රජයේ කඩවු මානව හිමිකම් යළි ඇති කරමින් ජාත්‍යන්තරය පිළිගත් රටක් ලෙස ඉදිරියට ගමන් කළයුතු බව වික්‍රමසිංහ මහතා සදහන් කරයි.  රට ගොඩනැගීමට ජාතික ආණ්ඩුවක අවශ්‍යතාව පැන නැගුන මොහොතක එම වෙනස්කම් රටතුළ ඇති කිරීමට වත්මන් රජය ක්‍රියාකළේය.  

සියඵ දෙනා එක්ව යන ගමන් මග අසීරු වුවත් රට ගොඩනැගීමට ඉදිරි පියවරක් තැබීම වැදගත් වෙයි.  වර්තමානය වනවිට එම එකමුතුවේ ප්‍රතිඵලයක් ලෙස අවශ්‍ය දේශපාලන හා ආර්ථික පදනම රටතුළ ස්ථාපිත කිරීමට හැකිවු බව අගමැතිවරයා සදහන් කරයි.  රටේ ණය ගැටඵවට විසදුම් දෙමින් ආර්ථිකය යහපත් මාවතකට යොමුකර ගැනීමට හැකියාව ලැබී තිබේ.  ඊට ජාත්‍යන්තර ප්‍රජාවගේද සහාය ලැබී ඇතැයි වික්‍රමසිංහ මහතා පවසයි.  නවකයන් දේශපාලනයට අවතිර්ණ වු පසු කලාපයේ හොදම රට බවට සනාථ කිරීමට අප සමත්විය යුතුය.

නල්ලුර් ප්‍රදේශයේ පොලිස් නිලධාරීන් දෙදෙනෙකුට එල්ල වු වෙඩි ප්‍රහාරය මහාධීකරණ විනිසුරුවරයා ඉලක්ක කර එල්ල වුවක් නොවන බව පොලිස් මාධ්‍ය ප්‍රකාශකවරයා පවසයි.

නල්ලුර් ප්‍රදේශයේ පොලිස් නිලධාරීන් දෙදෙනෙකුට ඊයේ එල්ල වු වෙඩි ප්‍රහාරය අනපේක්ෂිත එකක් බව පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර මහතා පවසයි.  එය මහාධිකරණ විනිසුරුවරයා ඉලක්ක කර එල්ල වු ප්‍රහාරයක් නොවන බව ඔහු පැවසුවේ පොලිස් මුලස්ථානයේ අද පැවැති මාධ්‍ය හමුවකදීය.

 මේ වනවිට සිද්ධීය පිළීබඳව පොලිසිය පුඵල් පරීක්‍ෂණයක් සිදුකරයි.  පොලිස්පතිතුමා ඒ සදහා පරීක්‍ෂණ කණ්ඩායම් දෙකක් පත්කර ඇත.  එක් පරීක්‍ෂණයක් උතුර භාර ජ්‍යෙෂ්ඨ නියෝජ්‍ය පොලිස්පති රොෂාන් ප්‍රනාන්දු මහතාගේ ප්‍රධානත්වයෙන් සිදුවෙයි.  එම පරීක්‍ෂණයට අදාළ වාර්තාවක් ලබන සදුදා භාරදීමට නියමිතයි.  මහාධීකරණ විනිසුරුවරයා එම අවස්ථාවේදී නල්ලුර් ප්‍රදේශයේ ගමන් කරමින් සිට ඇත.

 විනිසුරුවරයාගේ ආරක්‍ෂාවට එක් පොලිස් නිලධාරියෙක් යතුරු පැදියකින් ඉදිරියෙන් ගමන් කරමින් සිටි අතර තවත් නිලධාරියෙක් විනිසුරුවරයා ගමන්ගත් වාහනයේ සිට ඇත.  නල්ලුර් ප්‍රදේශයේදී ඇතිවු රථවාහන තදබදය නිසා යතුරුපැදියේ ගමන් ගත් පොලිස් සැරයන්වරයා ඉන් බැස මහාධිකරණ විනිසුරුවරයාගේ වාහනයට බාධාවකින් තොරව ඉදිරියට යාමට ඉඩ සලසා තිබේ.  එම අවස්ථාවේදී සිද්ධියට සම්බන්ධ ප්‍රධාන සැකකරු එම ස්ථානයට පැමිණ පොලිස් නිලධාරියාගේ පිස්තෝලය උදුරා එම නිලධාරියාට වෙඩි තබා තිබේ.  

එම අවස්ථාවේ වාහනයේ සිටි පොලිස් නිලධාරියා එම ස්ථානයට පැමිණ ඇත.  එහිදී ඔහුටද වෙඩි ප්‍රහාරයක් එල්ල කර තිබේ.  එම අවස්ථාවේදී මහාධිකරණ විනිසුරුවරයා එම ස්ථානයෙන් පිටත්කර යවා ඇති අතර පොලිස් නිලධාරීන් දෙදෙනා යාපනය රෝහලට ඇතුලත් කර ඇත.  අද අලුයම වාහනයේ ගමන්ගත් පොලිස් සැරයන් සරත් ප්‍රේමචන්ද්‍ර මහතා මියගොස් තිබේ.  51 හැවිරිදි ඒ මහතා දෙරු පියෙක් වන අතර හලාවත පදිංචිකරුවෙක් වෙයි.  අනෙක් නිලධාරියාගේ තත්ත්වය බරපතල නැත.  

මෙම සිද්ධීය වු අවස්ථාවේදී බීමතින් සිටි පුද්ගලයන් තිදෙනෙකු අතර බහින්බස්වීමක් සිදුවී ඇත.  පරණ ආරවුලක් ඊට හේතුවී තිබේ.  දැනට අත්අඩංගුවේ පසුවන දෙදෙනාගෙන් එක් අයෙකු ප්‍රධාන සැකකරුගේ සහෝදරයෙකු වන අතර සෙසු පුද්ගලයා ඥාතියෙකු වන බව පොලිස් මාධ්‍ය ප්‍රකාශකවරයා කියයි.  ප්‍රධාන සැකකරු අත්අඩංගුවට ගැනීම සදහා  පොලිස් කණ්ඩායම් යොදවනු ලැබ ඇත.

විශේෂාංග පුවත්

 

විදෙස් පුවත්